Pasqyrimi i sulmit serb në Gllogjan (24 mars 1998) sipas gazetës “Bujku”

Abstrakti

24 marsit të vitit 1998, ditën kur ndodhi agresioni ushtarak, policor e paramilitar serb në Gllogjan dhe fshatrat përreth, vëmendje pasqyrimi i kushtoi shtypi vendor dhe ai ndërkombëtar. Gazeta “Bujku”, e cila nxirrej në Prishtinë, publikoi disa artikuj, të cilët
përmbajnë të dhëna me rëndësi dhe shpalosin detaje madje edhe me fotografi të  sulmit të forcave serbe. Raportimet nga terreni për këtë organ shtypi bëheshin kryesisht nga gazetari Curr Mazrekaj, në disa raste botoheshin me iniciale e në raste të tjera pa emër dhe mbiemër autori. Edhe pse artikujt që botohen në gazeta, ose vetë gazeta si burim historik nuk mund të radhitet në grupin e burimeve që përdoren në rangun e dorës së parë, prapëseprapë vlera e tyre qëndron për faktin se ato mund të shfrytëzohen si burime relevante që i shërbejnë kompletimit të studimit të një personaliteti e ngjarje të caktuar ose në mungesë të dokumenteve përkatëse edhe të zëvendësojnë ato në disa
nuanca.