Shqipëria dhe Kosova në vitet 1998–1999: kriza dhe lufta, “learning by doing”

Abstrakti

Në vitin 1997-1998 Shqipëria kaloi një prej krizave më të mëdha shtetërore e shoqërore të periudhës postkomuniste, por edhe u përball me impaktin e shumëfishtë të ndikimeve të ngjarjeve në Kosovë. Kriza e refugjatëve, rezistenca e armatosur dhe diplomacia e bisedimeve, rënia e barrierave të mosnjohjes dhe përpjekja për rol kujdestar, përfshirja shpesh aktive dhe tendenca e sjelljes “politikisht korrekt” në raport me këshillat perëndimore, korrektimi i vazhdueshëm i qëndrimeve partiake e shtetërore dhe Kosova si test lidershipi ishin disa prej ngjarjeve dhe tipareve që shoqëruan riformatimin e rolit dhe qëndrimit të Shqipërisë ndaj zhvillimeve në Kosovë në prag të çlirimit të saj më 1999. Në aspektin studimor roli i Shqipërisë merr vlerë referuese dhe shfaq interes për të parë në formë krahasuese përgjegjësitë e ndikimet e shtetit kombëtar, bilancin zyrtar të ndikimit dhe sidomos për të reflektuar mbi legjitimitetin, mekanizmat, si dhe cilësinë dhe natyrën e ndikimit. Përmes burimeve arkivore e dokumentare, si dhe të dhënave të mbledhura nga pyetësorë me ekspertë të fushës dhe periudhës, krijohet mundësia për analizë të thelluar, vlerësim hipotezash dhe kontribut në plotësimin e vakumit ende të dukshëm shkencor në trajtimin e dukurive dhe raporteve të tilla midis Shqipërisë dhe Kosovës.